Бунёди кӯпруки нав дар Сурхоб

Душанбе, 22 май. (АМИТ «Ховар»). – Кӯпруки нави дарёи Сурхоб деҳаҳои дурдастро бо шаҳрҳо пайваста, дар ҳолатҳои фавқулодда ҳаёти мардумро аз хавфу хатар наҷот дода ва ба рушди соҳибкории хурду миёна мусоидат мекунад. Акнун сокинони 19 деҳа метавонанд, ки тавассути ин кӯпрук дарёи Сурхобро убур намуда, аз хидмати беморхонаҳо ва мактабу бозорҳои маркази ноҳияи Рашт бархӯрдор шаванд. Мувофиқи хабари намояндагии Бонки рушди Осиё воқеъ дар Тоҷикистон, соли 2007 бонки мазкур тавассути Хазинаи коҳиш додани камбизоатии Ҷопон кӯмаки бебозгаштро дар ҳаҷми 2 миллион доллари ИМА барои таъмини шароити беҳтари зиндагии мардуми деҳот маъқул ёфта буд.Кӯпруки нав вазъи ба бозорҳо бурдани маҳсулоти кишоварзиро беҳтар сохта ва хароҷоти нақлиётии фермерҳои маҳаллиро коҳиш медиҳад. Бо назардошти аҳамияти хидматрасонии доимии техникии кӯпрук дар ҳошияи лоиҳа ассотсиатсияҳо ва хазинаҳои хидматрасонии кӯпруку роҳҳо таъсис ёфтаанд.