Маҳсулоти ширӣ арзон мешавад

Душанбе, 14 май. (АМИТ «Ховар», Кристина Эрлих). – Тавре ки аз котиботи Вазорати энергетика ва саноати ҶТ ба мухбири АМИТ «Ховар» хабар доданд, тайи 4 моҳи соли равон дар Тоҷикистон, аз ҷумла дар шаҳрҳои Кӯлобу Ваҳдат ва ноҳияҳои Хуросону Ҳисор панҷ корхонаи нави хурди истеҳсоли маҳсулоти ширӣ бунёд гардид.Мувофиқи суханони манбаъ, ташкили иқтидорҳои нави истеҳсолӣ имкон медиҳад, ки талаботи аҳолии шаҳру ноҳияҳои зикршуда бо маҳсулоти ширӣ, ки бо нархи арзон фурӯхта мешаванд, пурра таъмин гардад. Қобили зикр аст, ки алҳол корхонаҳои ин соҳаи кишвар ҳар шабонарӯз беш аз 130 тонна маҳсулоти ширӣ истеҳсол менамоянд. Корхонаҳои соҳаи мазкур тайи чор моҳи соли ҷорӣ ба маблағи беш аз 11 миллиону 500 ҳазор сомонӣ маҳсулот истеҳсол намудаанд, ки назар ба нишондоди ҳамин давраи соли гузашта баробари 23,2 фоиз зиёданд.