Медали биринҷии ҳайати Ҷумҳурии Тоҷикистон аз Бозиҳои Делфӣ-2013

Душанбе, 29 май. (АМИТ «Ховар», Дилшодаи Хайруллоҳ) .- Чанде пеш дар шаҳри Новосибирски Федератсияи Русия Бозиҳои Делфӣ бо иштироки ҷавонони давлатҳои аъзои Иттиҳоди Давлатҳои Мустақил баргузор гардид. Дар чорабинӣ 2437 иштирокчӣ аз 21 кишвари олам, ки аз 28 номгӯй иборат буд, иштирок намуданд. Чорабиниро 500 ихтиёриён ва 145 аъзои доварон намояндагӣ карданд.Маросими кушодашавии Бозиҳои байналмилалии Делфӣ-2013 бо шукуҳу шаҳомати хосса баргузор гардид, ки беш аз 7000 нафар тамошобинон ин намоишро мушоҳида карданд. Мизбони ин чорабинии байналмилалӣ ҳукумати вилояти Новосибирски Федератсияи Русия 28 майдончаи номинатсияҳоро дар сатҳи баланд ва ҷавобгӯ ба талаботи чорабинӣ омода намуда, дар баргузор шудани он шароити мусоидро фароҳам овард. Ҷумҳурии Тоҷикистонро гуруҳи наврасон ва ҷавонон дар 6 номгӯй, аз ҷумла: санъати тасвирӣ, косибӣ, сурудҳои эстрадӣ, сурудҳои халқӣ, тарроҳи либос ва сирк муаррифӣ намуданд. Хушбахтона, дар ин чорабинии сатҳи байналмилалӣ ҳайати Ҷумҳурии Тоҷикистон як медали биринҷиро аз номгӯйи сирк бо иштироки намояндагони он Бахтиёр Иззатуллоев, Манижа Ҳанифова ва Мадина Назарова ба даст оварданд. Инчунин дар номгӯйи тарроҳи либос — Нигина Тошматова, дар номгӯйи сурудҳои эстрадӣ – Бахтовар Маҳмудов, дар санъати тасвирӣ – Беҳзод Боймуродов ва дар косибӣ – Обидҷон Бобомуродов сазовори дипломи Бозиҳои Делфӣ – 2013 гардиданд.Чорабинии мазкур ҳамчун Форуми олии ҳунар барои рушди фарҳангҳои миллӣ, афзоиши мероси фарҳангӣ, муколамаи байни фарҳангии давлатҳои аъзои Иттиҳоди Давлатҳои Мустақил ва баланд бардоштани сатҳи ҷаҳонбинии фарҳангии наврасон ва ҷавонон равона шудааст. Маҳз бо дастгирии Вазорати маориф, Вазорати фарҳанг, Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ва Студияи сирки давлатии Тоҷикистон ҳайати 12 нафараи Тоҷикистон тавонистанд дар ин форуми олии ҳунар кишвари азизамонро муаррифӣ намоянд. Дар ин бора ба мухбири АМИТ «Ховар» роҳбари ҳайати намояндагони Ҷумҳурии Тоҷикистон дар Бозиҳои Делфӣ-2013, мудири шуъбаи муносибатҳои байналмилалии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маҳмуд Амиров иттилоъ дод.