Мукофоти КВД «ТАЛКО» барои коргарони беҳтарин

Душанбе, 2 май. (АМИТ «Ховар», Кристина Эрлих). – Дар Корхонаи воҳиди давлатии «Ширкати алюминии Тоҷикистон» воқеъ дар шаҳри Турсунзода кормандони беҳтарини корхонаи мазкур, ки аз рӯи натиҷаи семоҳаи аввали соли 2013 дар озмун барои дарёфти унвони «Гурӯҳи беҳтарин», «Басти беҳтарин» ва «Коргоҳи беҳтарин» пирӯз шудаанд, мукофотонида шуданд. Ин чорабинӣ тайи солҳои Истиқлолияти Ҷумҳурии Тоҷикистон бори нахуст роҳандозӣ шуд. Тавре ки роҳбари дафтари матбуоти КВД «Ширкати алюминии Тоҷикистон» Саёҳат Қодирова ба АМИТ «Ховар» хабар дод, барои муайян намудани ғолибон комиссияи махсус таъсис дода шуд, ки он Низомномаи озмун барои дарёфти унвонҳои зикршударо тарҳрезӣ намуд.Акнун ҳар сол озмунҳо барои дарёфти унвони «Гурӯҳи беҳтарин», «Басти беҳтарин» ва «Коргоҳи беҳтарин» байни коргарони корхона доир намуда, ғолибон бо байрақҳои сайёр ва ифтихорномаҳо қадр карда мешаванд.