Вохӯрии Г. Ҳасанова бо намояндагони Бонки олмонӣ

Душанбе, 28 май. (АМИТ “Ховар”, Покиза Маҳмадбекова). — Имрӯз дар Душанбе вохӯрии раиси БДА ҶТ «Амонатбонк» Гулнора Ҳасанова ва муовини раиси раёсат Сироҷиддин Икромов бо намояндагони Бонки амонатгузории шаҳри Битбурги Олмон доир гардид. Ба мухбири АМИТ «Ховар» аз БДА «Амонатбонк» иттилоъ доданд, ки дар вохӯрӣ Гулнора Ҳасанова перомуни таърих ва фаъолияти кунунии “Амонатбонк”, ҳамкориҳои хориҷии бонк бо институтҳои молиявии байналхалқӣ ва самтҳои асосии хизматрасониҳои бонк маълумоти муфаcсал пешниҳод намуданд.Роҳбари Бонки амонатгузории Битбург Инголф Бермес аз фаъолияти бонки худ маълумот пешниҳод намуд, ки фаъолияти он ба хусус дар соҳаи дастгирии соҳибкорӣ, пешниҳоди қарзҳои имтиёзнок ба соҳибкорон, ҷалби пасандозҳои дарозмуддат ва самтҳои марбут ба соҳоти фермерӣ мебошад. Тарафҳо пас аз гуфтушунид ба хулосае омаданд, ки самти кори фаъолияти БДА «Амонатбонк» ва Бонки амонатгузории Битбург- ин хизматрасонӣ ва дастгирии соҳибкорону нафақахӯрон аст. Пас аз ин Гулнора Ҳасанова масъалаи ҳамкорӣ ва такмили ихтисоси кормандонро дар ин бонки Олмон пешниҳод намуд, ки мавриди пазироии меҳмонон гашт.