«Занги камолот» дар мактабҳои Тоҷикистон 7 июн садо медиҳад

Душанбе, 24 май. (АМИТ «Ховар», Дилшодаи Хайруллоҳ) .- Имсол «Занги камолот» дар мактабҳои Тоҷикистон рӯзи 7-уми июн садо хоҳад дод. Дар ин бора Вайсиддин Исмоилов, мутахассиси пешбари Раёсати ташкилоти томактабӣ ва миёнаи умумии Вазорати маориф ба АМИТ «Ховар» иттилоъ дод.Мавсуф афзуд, ки дар асоси қарори мушовараи Вазорати маориф аз моҳи декабри соли 2012 нақшаи таълимӣ таҷдиди назар карда шуд. Пештар 34 ҳафтаи таҳсил буд, лекин ҳисобот нишон дод, ки дар давраи истиқлолият рӯзҳои ҷашну идҳо 14 рӯзро ташкил медиҳад. Аз ҳамин лиҳоз хонандагон 34 ҳафтаро, ки дар нақшаи таълимӣ нишон дода шудааст, пурра намехонанд. Бино бар ин, занги камолот аз 25-уми май ба 7-уми июн гузаронида шуд.