Ҷаласа аз рӯи масоили амният

Душанбе, 17 июн. (АМИТ «Ховар»). – Чанде пеш дар шаҳри Брюссел ҷаласаи якуми Муколамаи ҳайатҳои олимақоми Иттиҳоди Аврупо ва Осиёи Марказӣ аз рӯи масоили амният баргузор гардид. Дар ҷаласа ҳайатҳои кишварҳои Осиёи Марказӣ дар сатҳи муовинони вазирони корҳои хориҷӣ ва намояндагони корпусҳои дипломатии кишварҳои Осиёи Марказӣ дар Иттиҳоди Аврупо ширкат доштанд. Роҳбари ҳайати Ҷумҳурии Тоҷикистонро дар ҷаласа муовини вазири корҳои хориҷӣ Низомиддин Зоҳидов ба ӯҳда дошт. Дар ҷаласа ҳайати Иттиҳоди Аврупо бо роҳбарии муовини Дабири кулли Хадамоти аврупоии фаъолияти хориҷии Иттиҳоди Аврупо Ҳелга Шмитд иштирок намуд. Иштирокдорони муколама аз рӯи чунин масоили асосӣ, аз қабили мубориза бо гардиши ғайриқонунии маводи нашъаовар, терроризм, ифротталабӣ, ҷилавгирии хавфи маводи кимиёвӣ, биологӣ, радиоактивӣ ва ҳастаӣ дар минтақа, ҳамчунин масъалаҳои вазъи ҳозираи Афғонистон, Эрон ва Сурияро мавриди муҳокима қарор доданд. Муовини вазири корҳои хориҷии Тоҷикистон зимни суханрониаш зикр намуд, ки солҳои охир раванди устувори гардиши ғайриқонунии маводи нашъаовар пайваста бо шаклҳои мухталифи ҷинояткории трансмиллӣ, аз қабили терроризми байналмилалӣ, қочоқи аслиҳа, одамрабоӣ ва ғайра, мушоҳида мешавад. Роҳбари ҳайати Тоҷикистон ба ташкилкунандагони Муколама изҳори миннатдорӣ карда, зикр намуд, ки Ҳукумати Ҷумҳурии Тоҷикистон ба соли 2014 дар шаҳри Душанбе доир намудани ҷаласаи навбатии Муколама омода аст. Ин пешниҳодро ҳамаи иштирокдорони ҷаласа пазируфтанд.