Ҷамъбасти ҳафтаи кӯдакон дар Кӯлоб

Кӯлоб, 4 июн. (АМИТ «Ховар», Ф.Мадаминов). – Бо мақсади ҳимояи ҳуқуқу манфиатҳои кӯдакон барои ҳаёти солим ва ҷамъиятӣ, таъмини Конвенсияи ҳуқуқи кӯдак ва бахшида ба рӯзи байналмилалии муҳофизати кӯдакон дар қаламрави шаҳру деҳоти Кӯлоб аз 24 то 31 маи соли ҷорӣ «Як ҳафтаи ҳаёти кӯдакон» гузаронида шуд.Чорабинии мазкур бо дастгирии ҳокимияти маҳалла, ташкилотҳои байналмилалӣ ва ҷамъиятӣ сурат гирифт. Ҳафтаи кӯдакон аз барномаҳои адабӣ, фарҳангӣ, варзишӣ ва озмунҳои «Расми беҳтарин», «Шеъру суруди беҳтарин», «Овозхони беҳтарин» иборат буд. Тӯли ҳафта наврасон маҳорати худро нишон доданд ва он 2 июн ҷамъбаст шуд. Ғолибони озмуни «Як ҳафтаи кӯдакон» бо туҳфаҳои хотиравии ташкилотҳои ҷамъиятӣ ва байналмилалӣ сарфароз гардиданд. Дар ин муддат ба маъюбон низ кӯмаки хайриявӣ расонида шуд.