Ба маблағи 100 миллион сомонӣ иншооти ҷашнӣ ба истифода дода шуд

Душанбе, 28 июн.(АМИТ “Ховар”, Марзия Саидова).-Ба ифтихори 16-умин солгарди Рӯзи ваҳдати миллӣ- 27 июн, ки дар саросари Тоҷикистон бо шукуҳ таҷлил гардид, дар пойтахти кишварамон- шаҳри Душанбе хонаҳои истиқоматӣ, мактаб ва майдончаҳои варзишӣ мавриди баҳрабардорӣ қарор гирифтанд. Аз ҷумла, дар асоси анъанаҳои шаҳрдорӣ ба маблағи 101 миллион сомонӣ фондҳои асосӣ аз ҳисоби буҷети шаҳр ва субъектҳои соҳибкорӣ, аз ҷумла мактаб барои 320 ҷойи нишаст, 15 ҳазор м2 манзили истиқоматӣ, 4900 м2 майдончаҳои варзишӣ ба истифода дода шуданд. Ҳамзамон дар партави сиёсати ободонию бунёдкории ҳукумати кишвар беш аз 3 км роҳҳои пойтахт аз таъмири асосӣ бароварда шуда, мавриди истифода қарор гирифтанд.