Густариши муносиботи Тоҷикистону Афғонистон дар самти маъюбият

Душанбе, 17 июн. (АМИТ «Ховар», Ибодат Давлатова).-Масъалаҳои тавонбахшии равони шахсони маъюб ва рушди минбаъдаи ҳамкориҳои байниидоравӣ дар мавзўи маъюбият дар мулоқоти муовини вазири меҳнат ва ҳифзи иҷтимоии аҳолии Ҷумҳурии Тоҷикистон Латофат Шарипова бо ҳайати коршиносони соҳаи тавонбахшии тиббию иҷтимоӣ ва руҳии Ҷумҳурии Исломии Афғонистон муҳокима гардид. Аз Вазорати меҳнат ва ҳифзи иҷтимоӣ иттилоъ доданд, ки дар мулоқот ҷонибҳо роҷеъ ба тавонбахшии рушди минбаъдаи ҳамкориҳои байниидоравӣ дар мавзўи маъюбият ва бозтавонии ҷисмонӣ табодули назар намуданд. Дар назар аст, ки ҳайати коршиносони Ҷумҳурии Исломии Афғонистон дар давоми сафари хизматиашон дар Тоҷикистон аз фаъолияти баъзе сохторҳои Вазорати меҳнат ва ҳифзи иҷтимоии аҳолӣ, аз ҷумла МД «Пажуҳишгоҳи ташхис ва барқарорсозии қобилияти кории маъюбон бо табобатгоҳ», МД «Маҷмааи таълимию таҷрибавии кори иҷтимоӣ ва инноватсияҳо», МД «Маркази миллии тавонбахшӣ барои кўдакон ва наврасони «Чорбоғ»» ва КВД «Заводҳои протезӣ- ортопедии шаҳри Душанбе» дидан кунанд.