Имзои шартномаи ҳамкорӣ миёни донишгоҳҳо

Душанбе, 4 июн. (АМИТ «Ховар», Раъно Нусратуллоева).- Миёни роҳбарияти Донишгоҳи давлатии омӯзгории Тоҷикистон ба номи С.Айнӣ ва Донишгоҳи Даугавпилсский (Латвия) дар мавриди табодули донишҷӯёну омӯзгорон, корҳои илмӣ, таълимӣ, аспирантура, омодасозии лоиҳаҳои муштарак, гузаронидани семинарҳо вобаста ба масъалаву мушкилоти омӯзгорӣ шартномаи ҳамкорӣ баста шуд. Маъмурияти донишгоҳҳо дар шахси ректори ДДОТ ба номи С.Айнӣ Абдуҷаббор Раҳмонов ва ректори Донишгоҳи Даугавпилсский, доктори илмҳои биологӣ, профессор Арвид Баршевскис бо имзои ин шартнома мехоҳанд ҳамкории қаблии худро, ки нисбатан кам буд, вусъат бахшанд. Ба қавли муовини ректор оид ба муносибатҳои байналмилалӣ Р.Абдуллоева, агар соле пештар 11 шартнома вуҷуд дошт, дар айни ҳол байни ин ду донишгоҳ зиёда аз 40 шартномаи ҳамкорӣ баста шуда, барои рушди соҳа ва тарбияи кадрҳои баландихтисос равона гардидааст.