Мулоқоти Ҳ.Зарифӣ бо устондори музофоти Хуросон

Душанбе, 28 июн. (АМИТ «Ховар»). – 27 июн вазири корҳои хориҷии Тоҷикистон Ҳамрохон Зарифӣ дар ҷараёни сафараш ба шаҳри Машҳад бо устондори музофоти Хуросони Ҷумҳурии Исломии Эрон Фурӯзон Меҳр мулоқот намуд. Ҷонибҳо дар ҷараёни мулоқот вусъати мусбати рушди ҳамкории дуҷониба ва зарурати вусъати бахшидани ҳамкорӣ дар бахшҳои нақлиёту коммуникатсия, кишоварзӣ ва соҳибкории инфиродиро ба таври махсус қайд намуданд. Ҳамрохон Зарифи таваҷҷуҳи мусоҳибро ба аҳамияти ба кишварҳои якдигар сафар кардани мутахассисони Эрону Тоҷикистон дар бахши саноати нассоҷӣ ва қолинбофӣ ҷалб намуд. Фурӯзон Меҳр дар навбати худ аз дастоварҳои музофоти Хуросон дар бахшҳои мухталиф, аз ҷумла дар соҳаи кишоварзӣ ва саноат нақл карда, зикр намуд, ки дар давраи гузашта дар Машҳад 5 намоишгоҳи молҳои саноатӣ бо иштироки намояндагони кишварҳои мухталифи ҷаҳон, аз ҷумла Тоҷикистон доир гардида буд.