О. Оқилов: «Ба зимистон аз имрӯз бояд омода шуд»

Душанбе, 10 июн. (АМИТ «Ховар», Дилшодаи Хайруллоҳ) .- Имрӯз дар ҳузури Сарвазири мамлакат Оқил Оқилов ҷаласаи навбатии ситоди ҷумҳуривӣ оид ба омодагӣ ва дар сатҳи баланд гузаронидани давраи тирамоҳу зимистони солҳои 2013-2014 баргузор гардид. Дар ситод оид ба ҷараёни омодагиҳо ба давраи тирамоҳу зимистони дар пешистода ахбороти шахсони масъул шунида шуд. Тавре таъкид шуд, бо мақсади иҷрои Қарори Ҳукумати Ҷумҳурии Тоҷикистон «Дар бораи саривақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2013-2014» дар тамоми сохторҳои мамлакат, ба истиснои соҳаҳои алоҳида нақшаи чорабиниҳо таҳия гардида, ситодҳои фаврӣ таъсис шудаанд. Оқил Оқилов масъулони вазорату идораҳои дахлдори мамлакат ва роҳбарияти вилоятҳо ва шаҳру ноҳияҳои ҷумҳуриро вазифадор кард, ки аз имконоту захираҳои мавҷуда самаранок истифода бурда, иҷрои корҳои авалиндараҷа, аз ҷумла таъмиру барқарорсозии иншооти энергетикӣ, роҳу нақлиёт, афзун намудани истиқроҷи ангиштсанг ва зиёд намудани захираи он, бештар намудани шумораи нуқтаҳои фӯруши ангиштсанг ва гази моеъ дар маҳалаҳои аҳолинишинро таъмин намуда, барои дар сатҳи зарурӣ гузаронидани давраи тирамоҳу зимистон аз ҳозир ҳамаҷониба омодагӣ бинанд.