О. Оқилов: «Конфронси Душанбе ба ҳалли мушкилоти об дар сайёра мусоидат менамояд»

Душанбе, 5 июн. (АМИТ «Ховар», Дилшодаи Хайруллоҳ) .- Имрӯз Сарвазири Ҷумҳурии Тоҷикистон Оқил Оқилов бо аъзои Кумитаи байналмилалии ҳидояткунандаи Конфронси сатҳи баланд оид ба ҳамкорӣ дар соҳаи об мулоқот кард.  Оқил Оқилов дар мулоқот бо гуруҳи коршиносону мутахассисони соҳаи об аҳамияту муҳимияти баргузории Конфронси байналмилалии сатҳи баланд оид ба ҳамкориҳо дар соҳаи обро махсус таъкид карда, изҳор дошт, ки «Дар Тоҷикистон барои дар сатҳи зарурӣ гузаронидани ин чорабинии муҳими сатҳи ҷаҳонӣ тамоми тадбирҳо андешида мешаванд, то натиҷаҳои конфронси мазкур дар оянда барои таҳкими ҳамкориҳои минтақавию ҷаҳонӣ дар соҳаи об ва ҳалли масоили марбут ба мушкилоти об дар сайёра мусоидат намоянд». Тавре ки таъкид шуд, Кумитаи байналмилалии ҳидояткунандаи Конфронси сатҳи баланд оид ба ҳамкорӣ дар соҳаи об бо мақсади дар сатҳи зарурӣ ва фарогирии мавзуъҳои муҳими ҳамкориҳо омода ва гузаронидани Конфронси Душанбе оид ба ҳамкориҳо дар соҳаи об таъсис дода шуда, аъзои он аз коршиносону мутахассисони байналмилалӣ ва ватании соҳаи об иборат мебошад.