Ҳолати техникаҳои махсуси корхонаҳои коммуналӣ ташвишовар будааст

Душанбе, 12 июл. (АМИТ «Ховар).-«Дар миқёси ҷумҳурӣ аз 65 адад партовгоҳи сахти маишии мавҷудбуда танҳо безараргардонии 4 партовгоҳ аз ҷумла, дар шаҳрҳои Душанбе, Хуҷанд, Чкалов ва Ёвон ба роҳ монда шуда, дар дигар шаҳру ноҳияҳо ин кор қисман ташкил карда шудаст»- зикр намуд директори генералии КВД «Хоҷагии манзилию коммуналӣ» Алимурод Тағоймуродов зимни нишасти матбуотӣ. Номбурда афзуд, ки баҳри ободонии партовгоҳ ва ташкили коркарди партовҳои сахти маишӣ КВД «ХМК» лоиҳаҳои сармоягузорӣ таҳия намуда, барои маблағугзорӣ ба ташкилотҳои хориҷӣ пешниҳод намудаааст. «Айни ҳол корҳо дар ин самт идома доранд ва маблағғузории лоиҳаҳои музкур аз тарафи Бонки Аврупоии таҷдид ва рушд дастгирӣ ёфт» -гуфт ӯ.Ба иттилои А. Тағоймуродов , имрӯз ҳолати техникаҳои махсуси корхонаҳои коммуналӣ ҳанӯз ҳам ташвишовар боқӣ монда, ин масъала ҳалли оҷилии худро тақозо дорад. Тағоймуродов гуфт, аз шумораи умумии техникаҳои махсуси коммуналӣ, ки 859 ададро ташкил медиҳанд, ҳамагӣ 480 адади он коршоям аст. Чунончи дар нишасти матбуотӣ зикр шуд, корхонаҳои тобеи КВД «Хоҷагии манзилию коммуналӣ» дар 6 моҳи соли равон зиёда аз 2300 метри мураббаъ боми хонаҳои истиқоматӣ, 636 метр қубурҳои оби нӯшокӣ, 1, 7 ҳазор метри мураббаъ роҳу роҳравҳо, 1200 м хатҳои барқро таъмин карда, даҳҳо таҳхонаҳоро аз об тоза кардаанд.