Беҳтарин коромӯз соҳиби дастгоҳи дӯзандагӣ шуд

Душанбе, 19 июл.(АМИТ «Ховар», Марзия Саидова).- Дар коргоҳи омӯзишии дӯзандагии муштараки назди Маркази таълимии калонсолони шаҳри Душанбе, ки соли 2007 дар ҳамоҳангии Вазорати меҳнат ва ҳифзи иҷтимоии аҳолии Ҷумҳурии Тоҷикистон ва намояндагии дафтари Кумитаи байналмилалии имдоди имом Хумайнии Эрон дар Тоҷикистон таъсис ёфта буд, маросими давраи 24-уми хатми коромӯзон баргузор гардид. Дар ин давра 28 нафар духтарон нозукиҳои касби чевариро аз худ карда, соҳиби гувоҳнома гардиданд. Дар маросими хатми давраи омӯзиши касби дӯзандагӣ Саидмаҳди Ибодӣ- раиси дафтари намояндагии Кумитаи имдоди Эрон дар Тоҷикистон, Алишер Фаромузов-директори Маркази омӯзиши калонсолони назди Агентии шуғли аҳолии ҷумҳурӣ ва намояндагони Вазорати меҳнат ва ҳифзи иҷтимоии ҷумҳурӣ ширкат намуда, бонувонро бо хатми давраи омӯзиши ҳунари чеварӣ табрик намуданд. «Ҳар гоҳе, ки вориди ин коргоҳи муштарак мегардам ва бо завқ коромӯзии хоҳаронро мебинам, беихтиёр як шодмонӣ вуҷудамро фаро мегирад, зеро ин хоҳарон соҳибкасб шуда, ба бозори меҳнат дохил мешаванд ва рисқу рӯзии худро бо меҳнати ҳалол пайдо менамоянд», -мегӯяд Алишер Фаромузов, мудири Маркази таълимии калонсолони шаҳри Душанбе.  Дар фарҷоми маросими хатми давраи дӯзандагӣ мудири намояндагии дафтари Кумитаи имдод дар Тоҷикистон Саидмаҳдӣ ба ҷавондухтарон дар ҷодаи ҳунари чеварӣ барори кор таманно карда, ба яке аз беҳтарин коромӯз як адад мошинаи дӯзандагӣ ва ба дигаре 2000 сомонӣ ҷиҳати ифтитоҳ намудани коргоҳи дӯзандагӣ тақдим кард. То кунун Кумитаи имдод дар ҳамкорӣ бо Вазорати меҳнат ва ҳифзи иҷтимоии Тоҷикистон дар минтақаҳои гуногуни кишвар 67 коргоҳи омӯзиши таъсис дода аст, ки фарзандони оилаҳои ниёзманд дар ин коргоҳҳо касбҳои дузандагӣ, барномасози компётер, сангтарошӣ, заргари, сантехникӣ ва кафшергариро аз бар намуда, вориди бозори меҳнат гардидаанд. Абдулғаффори Солеҳ-масъули умури идорӣ ва равобити умумии намояндагии дафтари Кумитаи имдод дар Тоҷикистон мегӯяд, ки Кумита дар зарфи 18-соли фаъолияташ дар Тоҷикистон пайваста ба хонаводаҳои бесарпарасту ниёзманд дар ҳамоҳангии ҳукуматҳои шаҳру ноҳияҳов ва вазорату идораҳои давлатӣ дар самтҳои мухталиф кӯмак мерасонад. Хусусан ба оилаҳое, ки таҳти ҳимояти намояндагии Кумита қарор доранд кӯмакҳо дар бахши маводи хӯрока,фарҳанги,таъмири манзил,карзҳои бефоизи худкафоӣ, дармонӣ ва касбомӯзӣ ироа месозад.