М. Маҳмадаминов ҷониби аморатиро ба муҳоҷирпазирӣ даъват кард

Душанбе, 1 июл. (АМИТ «Ховар», Ибодат Давлатова).-Вазири меҳнат ва ҳифзи иҷтимоии аҳолии Ҷумҳурии Тоҷикистон Маҳмадамин Маҳмадаминов рўзи 28 июни соли ҷорӣ дар ҳошияи сафари хидматияш ба шаҳри Манамаи Шоҳигарии Баҳрайн дар шаҳри Дубайи Амороти Муттаҳидаи Араб бо иштироки Кордори Сафорати Ҷумҳурии Тоҷикистон дар Абу Даби Юсуф Бобокалонов бо муовини аввали Вазири меҳнати АМА Муборак Сайд ад Даҳерӣ мулоқот доир намуд. Зимни мулоқот ҷонибҳо оид ба сатҳи кунунии равобити дуҷонибаи байни ду давлат суҳбат намуда, масъалаҳои марбут ба танзими бозори меҳнат ва ҳифзи иҷтимоии аҳолиро мавриди муҳокима қарор доданд. Дар ҷараёни вохўрӣ Муборак Сайд ад Даҳерӣ иттилоъ дод, ки айни замон Ҳукумати АМА ислоҳоти азими низоми иҷозатномаҳои кориро гузаронида истодааст, ки мақсади он кам намудани теъдоди коргарони камсавод ва ҷалби бештари мутахассисони баландихтисос ба АМА мебошад.Инчунин, Вазири меҳнат ва ҳифзи иҷтимоии аҳолии Ҷумҳурии Тоҷикистон тазаккур дод, ки шаҳрвандони Тоҷикистон аз рўи сатҳи дониш ва малакаҳои худ дорои тамоми имкониятҳои кор ва фаъолият дар АМА мебошанд. Аз ин хотир, ў ҷониби аморатиро даъват намуд, ки ҷалби шаҳрвандони Ҷумҳурии Тоҷикистонро барои кор дар АМА боз ҳам васеътар намояд.Дар ҷавоб ал Даҳерӣ пешниҳод намуд, ки ҳамкорӣ байни ҳарду Вазорат оғоз карда шавад. Дар ин робита Кордори Сафорат ба маълумоти Вазирон расонид, ки дар санаи 8 — 9 октябри соли ҷорӣ дар шаҳри Абу Дабӣ нахустин ҷаласаи Коммиссияи муштараки байнихукуматии ҶТ ва АМА оид ба ҳамкориҳои тиҷоратӣ, иқтисодӣ, техникӣ ва илмӣ баргузор мегардад. Дар ин бора ба мухбири АМИТ «Ховар» аз Вазорати мазкур иттилоъ доданд.