Пойгаи автомобилӣ дар шоҳроҳи Душанбе-Хуҷанд

Душанбе, 2 июл.(АМИТ «Ховар»,Фарзона Достонзода).- Бо ибтикор ва дастгирии ҳафтаномаи «Вечёрка», Маркази фарҳангии «Аржанг», КИМ ҲХДТ ва ТҶҶ «Созандагони Ватан» санаи 29 ва 30 июни соли ҷорӣ Аксияи умумимиллии ҷавонон — пойгаи автомобилии «Шоҳроҳи Ваҳдат», дар шоҳроҳи Душанбе-Хуҷанд баргузор гашт. Дар мусобиқа 130 нафар ҷавонон аз тамоми минтақаҳои ҷумҳурӣ ширкат варзиданд. Мақсад аз баргузор намудани чунин чорабинӣ боз ҳам мустаҳкам намудани дӯстиву рафоқат, ваҳдати миллӣ, аз байн бардоштани сарҳад байни минтақаҳои ҷумҳурӣ, баланд бардоштани ҳисси ватандӯстӣ, дониши фарҳангӣ-таърихӣ, муаррифӣ бо расму оин ва дастовардҳои минтақаҳои ҷумҳурӣ миёни ҷавонон мебошад. Чорабиниро КИМ ҲХДТ, ТҶҶ «Созандагони Ватан», Мақомоти иҷроияи ҳокимияти давлатӣ дар вилояти Суғд, Ширкати ТСELL, Ширкати Фароз, Ширкати IRS, Ширкати CoolDesign, ҳафтаномаи «Вечёрка» ва Маркази фарҳангии «Аржанг» сарпарастӣ намуданд.