Сафари кории Консули генералии Тоҷикистон ба вилояти Измири Туркия

Душанбе, 30 июл. (АМИТ «Ховар»).- 26-27 июли соли 2013 Консули генералии Ҷумҳурии Тоҷикистон дар шаҳри Истанбул Илҳом Абдураҳмонов бо мақсади шиносоӣ аз минтақаҳои ҳавзаи консулӣ ба вилояти Измири Туркия сафар намуд. 26 июл вохӯрии Консули генералӣ бо волии вилояти Измир Мустафо Топрак баргузор гардид, ки зимни он масоили рушди ҳамкориҳои гуногунҷабҳаи Тоҷикистону Туркия, аз ҷумла ба роҳ мондани робитаҳои самарабахш миёни вилояти Измир ва вилоятҳои мухталифи Тоҷикистон, шароити зисту таълими донишҷӯёни тоҷик дар донишгоҳҳои Измир баррасӣ гардиданд. Дар идомаи сафар 27 июли соли 2013 Консули генералӣ бо ноиби Президенти Шӯрои иҷроияи Палатаи саноати вилояти Измир Иброҳим Гочуоғлу ва Дабири кулли ин палата Мустафо Калёнҷӯ мулоқот анҷом дод. Дар доираи суҳбат масъалаҳои ҳамкориҳои иқтисодию тиҷоратӣ ва иштироки ширкату корхонаҳои узви ин палата дар лоиҳаҳои сармоягузории Тоҷикистон баррасӣ гардиданд. Вилояти Измир дар ғарби Туркия дар соҳили баҳри Эгей ҷойгир буда, аз 30 ноҳия иборат мебошад, масоҳаташ 11973 км2 ва аҳолиаш 4005459 нафар аст. Дар вилоят соҳаҳои нассоҷӣ, истеҳсоли либос, мошинсозӣ, сайёҳӣ, истеҳсоли маводи ғизоӣ ва кишоварзӣ рушд ёфтаанд. Бандари Измир пас аз бандари Истанбул дуюмин калонтарин бандари Туркия ба ҳисоб меравад.