Тоҷикистон ва шарикии глобалӣ

Душанбе, 25 июл. (АМИТ «Ховар», Бекназари Абӯбакр). — 24 июл зимни баргузории семинари миллӣ таҳти унвони «Тоҷикистон ва раванди байналмилалии шарикии глобалӣ» муаррифии нашрияҳои навбатии солонаи Кумитаи давлатии сармоягузорӣ ва идораи амволи давлатии Тоҷикистон – «Ҳамкорони рушд дар соли 2013» ва «Ҳисоботи беруна дар соли 2013» муаррифӣ гардиданд. Зикр гардид, ки соли 2012 ба Ҷумҳурии Тоҷикистон ба маблағи бештар аз 388 млн. доллари ИМА кўмаки беруна ворид шудааст, ки аз он 179 млн. доллари ИМА барои амалӣ сохтани лоиҳаҳои давлатии сармоягузорӣ равона гардидааст. Ҳаҷми бештари кўмакҳо аз тарафи Олмон, Чин, Япония пешниҳод шудааст. Дар байни институтҳои байналмилалии моливӣ кўмаки назаррас аз тарафи Бонки осиёии рушд, Бонки умумиҷаҳонӣ, Бонки исломии рушд ва ғ. расонида шудааст. Дар муаррифии мазкур хулосаҳои муҳим ва пешниҳодҳо доир ба беҳтар гардонидани ҳамоҳангсозии минбаъдаи кўмаки беруна ва афзудани самаранокии он дар Ҷумҳурии Тоҷикистон баён гардиданд.Дар ҷараёни муҳокимаи баргузоршуда қадамҳои минбаъда дар мавриди рушди ҳамкорӣ байни Ҳукумати Ҷумҳурии Тоҷикистон ва шарикони рушд, беҳтар сохтани ҳамоҳангсозии кўмаки беруна дар самти бахшҳо ва минтақаҳо, истифодаи самараноки «Низоми идоракунии иттилоотии кўмаки беруна», иштироки Тоҷикистон дар раванди байналмилалии шарикии глобалӣ ва мониторинги он муайян гардиданд.