Барномаи компютеркунонӣ иҷро мешавад

Душанбе, 22 август. (АМИТ «Ховар», Фарзона Достонзода). – То имрӯз дар вилояти Суғд барномаи компютеркунонии мактабҳо баробари 98 фоиз иҷро шудааст. Соли гузашта дар вилоят 49 мактаб ба шабакаи интернет пайваст гардида, то имрӯз 505 мактаб вориди ин шабака шудааст. Тавре ки аз хадамоти матбуоти раиси вилояти Суғд ба АМИТ «Ховар» хабар доданд, барномаи мазкур барои се давра пешбинӣ шуда, давраи аввал солҳои 2003 – 2007, давраи дуюм солҳои 2009 – 2010 – ро фаро гирифта. давраи сеюм бояд аз соли 2011 то 2015 идома ёбад.Мувофиқи суханони манбаъ, мактабҳои минтақаҳои Истиқлол, Қайроққум ва Зафаробод ба дараҷаи баланд бо компютерҳо таъмин шудаанд. Мактабҳои шаҳру ноҳияҳои зикршуда аз ҳисоби Фонди захираи Президенти кишвар бо компютеру техникаи дигари зарурӣ таъмин гардидаанд. Хотирнишон месозем, ки барномаи компютеркунонии мактабҳои Ҷумҳурии Тоҷикистон соли 2003 қабул шуда буд. Мутобиқи ин барнома барои ҳар як 15 нафар хонанда бояд 1 компютер рост ояд.