Баррасии масоили мубориза ба муқобили хариду фурӯши одамон

Душанбе, 14 август. (АМИТ «Ховар», Руқияи Боймамад).- Имрӯз дар толори Маркази иттилоот ва муошират ҷаласаи навбатии Комиссияи байниидоравии мубориза ба муқобили хариду фурӯши одамон доир гардид. Дар ҷаласа маълумоти раиси Комиссияи байниидоравӣ-мудири шуъбаи мудофиа ва тартиботи ҳуқуқии дастгоҳи иҷроияи Президенти Ҷумҳурии Тоҷикистон Абдусаттор Раҷабов оид ба натиҷаи фаъолияти комиссия дар ҳафт моҳи аввали соли 2013 ва ҳисоботи роҳбарони гуруҳҳои кории комиссия, муовини вазири маориф, муовини вазири меҳнат ва ҳифзи иҷтимоии аҳолӣ ва муовини раиси Кумитаи ҷавонон, варзиш ва сайёҳӣ доир ба ҷараёни татбиқи «Барномаи маҷмӯии мубориза ба муқобили хариду фурӯши одамон дар ҶТ барои солҳои 2011-2013» шунида шуд. Вазорату идораҳои масъули иҷрои барнома ва гуруҳҳои кории комиссия вазифадор шудаанд, ки то моҳи декабри соли ҷорӣ ҷиҳати татбиқи амалии ин барнома тадбирҳои ҷиддӣ андешанд.Бо мақсади тақвияти муқовимат бо савдои одамон лоиҳаи «Нақшаи чорабиниҳои иловагии муқовимат бо савдои одамон дар ҶТ барои солҳои 2013-2014» маъқул дониста шуд.Ҳамзамон бо қарори Комиссияи байниидоравӣ аз ҳисоби намояндагони вазорату идораҳо ҷиҳати таҳияи лоиҳаи «Нақшаи миллии муқовимат ба савдои одамон дар ҶТ барои солҳои 2014-2016» гуруҳи корӣ таъсис дода шуда, он вазифадор гардид, ки то моҳи декабри соли ҷорӣ лоиҳаи «Нақшаи миллии муқовимат ба савдои одамон дар ҶТ барои солҳои 2014-2016»-ро мутобиқ ба талаботи низоми миллӣ ва байналмиллалии муқовимат ба савдои одамон таҳия ва барои тасдиқ ба Ҳукумати ҶТ манзур намояд.Зимни чорабинии мазкур намояндагони ташкилотҳои байналмиллалӣ ва ғайриҳукуматӣ низ ибрози андеша карданд.Дар чорабинии мазкур намояндагони корпуси дипломатии муқими Тоҷикистон ва ташкилотҳои байналмиллалию ғайриҳукуматӣ иштирок доштанд.