Дар Тоҷикистон таваллуди писарон бештар аст

Душанбе, 13 август.(АМИТ «Ховар», Марзия Саидова).- Теъдоди хонаводаҳо дар Тоҷикистон 1 миллиону 197,2 ҳазорро ташкил медиҳад, ки дар онҳо 7 миллиону 523 ҳазор нафар зиндагӣ менамоянд. Шумораи мардҳо 3817 ҳазор ва занҳо 3747,5 ҳазор нафарро ташкил дода, ба 100 таваллуди духтар 106,107 писар рост меояд. Ин матлаб зимни баргузории мизи мудаввар «Оид ба ҷамъбасти натиҷаҳои асосии барӯйхатгирии аҳолӣ ва фонди манзил дар соли 2010», ки имрӯз дар Агентии омори назди Президенти ҷумҳурӣ доир гардид, зикр шуд. Дар нишаст Бахтия Муҳаммадиева –директори Агентии омори ҷумҳурӣ, ҷаноби Вернер, мудири минтақавии Бунёди нуфуси Созмони Милали Муттаҳид /СММ/ доир ба аҳамият ва паҳлуҳои афзалиятноки баргузории ин чорабинии муҳим- барӯйхатгирии аҳолӣ ва фонди манзил, хусусан дар самти муайян намудани дурнамои рушди соҳаҳои иқтисодиёт ва иҷтимоии кишвар ва таҳияи стратегияи рушди миллӣ табодули назар карданд. Зебо Исмоилова-масъули ниҳоди омори кишвар марбут ба барӯйхатгирии аҳолӣ ва фонди манзил дар назди ҳозирин роҷеъ ба натиҷаҳои ин маъракаи муҳими сиёсию давлатӣ сухан кард. Мавсуф афзуд, ки тибқи натиҷаҳои ин чорабинии муҳими давлатӣ агар зимни барӯйхатгирии аҳолӣ нуфуси Тоҷикистон дар соли 1914-ум 1 миллиону 34, 4 ҳазор нафарро ташкил медод, пас ин омор дар соли 2010 ба 7 миллиону 564,5 ҳазор нафар расидааст. Тибқи барӯйхатгирии аҳолӣ ва фонди манзили соли 2010 –ум 2,006,5 ҳазор нафар аҳолии Тоҷикистон шаҳрнишин буда, 5557,9 нафари аҳолии кишвар дар деҳот сукунат доранд. Тибқи барӯйхатгирии аҳолӣ ва фонди манзили соли 2010 дар Тоҷикистон 58 ноҳия, 17 шаҳр, 57 шаҳрак, 369 ҷамоати деҳот ва 3951 деҳа ба қайд гирифта шудааст. Ҳамзамон Зебо Исмоилова афзуд, ки ҷилдҳои 1,2,3,4,5,6 ва 7-уми нашри расмии натиҷаҳои барӯйхатгирии аҳолӣ ва фонди манзил дар соли 2010 таҳия ва чоп шудааст. Инчунин Агентии омори мамлакат нусхаи электронии онро дар компакт-дискҳои махсус сабт намуда, дар ҳар як ҷилд онро ҷой додааст. Мавриди зикр аст, ки аз 21 то 30 сентябри соли 2010 дар Тоҷикистон барӯйхатгирии аҳолӣ ва фонди манзил гузаронида шуда буд. Тибқи эъломияи СММ барӯйхатгирии аҳолӣ дар ҳар як даҳсола гузаронида мешавад.