Конфронси байналмилалӣ дар шаҳри Душанбе

Душанбе, 15 август. (АМИТ «Ховар», Пайрав Назаров). – Мутобиқи қатъномаи Ассамблеяи Генералии Созмони Милали Муттаҳид 20 ва 21 август дар шаҳри Душанбе бо иштироки ҳайатҳои олимақом Конфронси байналмилалӣ аз рӯи масъалаи ҳамкорӣ дар бахши истифодаи об баргузор мегардад.Мақсади асосии конфронс иборат аз мусоидат ба беҳдошти ҳамкорӣ дар бахши истифодаи об бо усули тарғиби таҷрибаи беҳтарин, интишори технологияҳои бехатари экологӣ, таъмини иштироки ҳамаи ҷонибҳои манфиатдор дар ин амр ва ғайра мебошад. Тавре ки аз Раёсати иттилоот, матбуот, таҳлил ва тарҳрезии сиёсати хориҷии Вазорати корҳои хориҷии ҶТ хабар доданд, иштироки Президенти Ҷумҳурии Тоҷикистон Эмомалӣ Раҳмон дар маросими ифтитоҳи конфронс дар назар аст. Алҳол қариб 70 давлати аъзои Созмони Милали Муттаҳид иштироки худро дар ин конфронс тасдиқ намудаанд. Теъдоди иштироккунандагони конфронс беш аз 900 нафарро ташкил медиҳад.