Мулоқоти Ҳ. Зарифӣ бо Сарвазири Мозамбик

Душанбе, 22 август. (АМИТ «Ховар»). – 21 август Вазири корҳои хориҷии Ҷумҳурии Тоҷикистон Ҳамрохон Зарифӣ бо Сарвазири Ҷумҳурии Мозамбик Алберто Клементино Антонио Ваквина мулоқот намуд.Сарвазири Мозамбик ба ҷониби Тоҷикистон барои ташкили Конфронси байналмилалӣ дар сатҳи баланд оид ба ҳамкорӣ дар бахши истифодаи об изҳори сипос намуда, Ҳамрохон Зарифиро барои муваффақона доир шудани ин Конфронс муборакбод кард. Ҷонибҳо дар ҷараёни мулоқот роҳҳои рӯи кор овардани ҳамкории дуҷонибаро мавриди муҳокима қарор дода, дар мавриди роҳандозии ҳамкорӣ дар бахшҳои энергетика, саноат, тиб ва кишоварзӣ мубодилаи афкор намуданд.Ваквина ба ҷониби Тоҷикистон аз вазъияти иқтисодиёти Мозамбик ва рушди он муфассал хабар дод. Мавсуф, аз ҷумла, қайд намуд, ки Ҷумҳурии Мозамбик аз захираҳои энергетикию минералӣ ғанӣ буда, инфраструктура ва бахши кишоварзии худро рушду тараққӣ медиҳад.Зимни мулоқот пешниҳод шуд, ки таҳкурсии меъморию ҳуқуқии дуҷониба гузошта шавад, зеро ҳар ду ҷониб барои рушди муносибатҳояшон имкониятҳои фаровон доранд.Дар хотима Вазири корҳои хориҷии Тоҷикистон Сарвазири Мозамбикро бо боздиди аввалинаш аз Тоҷикистон муборакбод карда, зикр намуд, ки «ин сафар саҳифаи нави муносибатҳои ҳар ду кишварро мекушояд». Дар ин бора аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд.