Мулоқоти Гул Шералӣ бо ҳайати намояндагони Афғонистон

Душанбе, 16 август. (АМИТ «Ховар», Зарангези Латиф).- Дирӯз мулоқоти вазири энергетика ва саноати Ҷумҳурии Тоҷикистон Гул Шералӣ бо вазири молияи Ҷумҳурии Исломии Афғонистон Ҳазрат Умар Зохилвол, раиси идораи роҳи оҳани Ҷумҳурии Исломии Афғонистон Ямо Шамс ва Сафири Ҷумҳурии Исломии Афғонистон дар Ҷумҳурии Тоҷикистон Абдуғаффор Орзу баргузор гардид. Зимни мулоқот масъалаҳои CASA 1000, ХИБ 220 кВт Тоҷикистон- Афғонистон, ХИБ 500 кВт Тоҷикистон, Афғонистон, Эрон ва хатти лӯлаи гази табиӣ аз Шибирғони Афғонистон ба Тоҷикистон аз тариқи Шаҳритус мавриди баррасӣ қарор дода шуд. Дар ҷараёни мулоқот вазири энергетика ва саноати Ҷумҳурии Тоҷикистон оид ба лоиҳаи сармоягузорӣ дар соҳаи энергетика ва бахшҳои гуногуни саноат, фазои мусоиди сармоягузорӣ дар ҷумҳурӣ ибрози назар намуд. Ҷонибҳо аз натиҷаи вохӯрӣ изҳори қаноатмандӣ намуда, ҳамчунин иброз доштанд, ки густариши ҳамкориҳои дуҷониба дар бахшҳои мазкур ба манфиати ҷонибҳо хоҳад буд. Дар ин бора аз хадамоти матбуоти вазорати мазкур ба хабарнигори АМИТ «Ховар» иттилоъ доданд.