Мушовараи якҷояи вазоратҳои корҳои дохилии Тоҷикистон ва Русия

Душанбе, 23 август. (АМИТ «Ховар», Фарзона Ашӯрмадова).-Дар назар аст, рӯзҳои 26-27 августи соли ҷорӣ дар шаҳри Екатеринбург ҷаласаи навбатии мушовараи якҷояи вазоратҳои корҳои дохилии Тоҷикистон ва Федератсияи Русия баргузор гардад. Тавре ки дар ин бора сомонаи Вазорати корҳои дохилии кишвар менависад, мутобиқи нақшаи кории мушовара барои соли ҷорӣ масъалаҳои зерин баррасӣ мешаванд:1. «Мукаммалнамоии ҳамкориҳои мақомоти корҳои дохилии Ҷумҳурии Тоҷикистон ва Федератсияи Русия вобаста ба бастани роҳҳои интиқоли маводи нашъаовар ба воситаи нақлиёти роҳи оҳан ва ҳавоӣ».2. «Дар бораи ҳамкориҳои ҷузъу томҳои тафтишотии вазоратҳои корҳои дохилии Тоҷикистон ва Федератсияи Русия оид ба ошкор ва бурдани тафтиши ҷиноятҳои вазнин ва махсусан вазнин, аз ҷумла аз ҷониби гуруҳҳои муташаккил ва ташкилотҳои ҷиноии дорои алоқаи байналмиллалӣ содиршуда».3. «Оид ба мукаммалнамоии мубодилаи иттилоот байни ҷузъу томҳои фаврии вазоратҳои корҳои дохилии Ҷумҳурии Тоҷикистон ва Федератсияи Русия».4. «Тасдиқи лоиҳаи Нақшаи кории мушовараи якҷояи вазоратҳои корҳои дохилии Ҷумҳурии Тоҷикистон ва Федератсияи Русия барои соли 2014».Аз сабаби муҳим будани мушкилоти мубориза бо интиқоли маводи нашъаовар ва ҷаҳонишавии ин намуди ҷиноят масъалаҳои мубориза бо гардиши ғайриқонунии маводи мухаддир дар ҷаласаҳои мушовараи якҷоя мунтазам мавриди баррасӣ қарор дода мешаванд. Ҷузъу томҳои вазоратҳои корҳои дохилии Тоҷикистон ва Федератсияи Русия дар доираи шартномаҳои дуҷонибаи ба имзо расида ва бо мақсади татбиқи Қарори мушовараи якҷоя давра ба давра вохӯриҳои корӣ мегузаронанд, ки дар рафти он масъалаҳои мубрами ҳамкориҳо ва корҳои пешгирии фаъолияти ҷинояткориҳои алоҳида ва гуруҳҳои ҷиноӣ фавран баррасӣ мешаванд.