Проблемаи нашъамандӣ дар ВМКБ

Душанбе, 16 август. (АМИТ «Ховар», Фарзона Достонзода). – Чанде пеш дар шаҳри Хоруғи Вилояти Мухтори Кӯҳистони Бадахшон ҷаласаи Шӯрои ҳамоҳангсозӣ оид ба ҷилавгирии сӯистеъмоли маводи нашъаовар баргузор гардид. Дар ҷаласа муовини раиси ВМКБ К.Алибердиева зикр намуд, ки сарфи назар аз тадбирҳои созмонҳои давлатию ҷамъиятии вилоят барои коҳиш додани паҳншавии нашъамандӣ, ин проблема ҳанӯз ҳам арзи вуҷуд дошта ва барои рафъи он бояд дар ҳошияи Стратегияи миллии мубориза бо гардиши ғайриқонунии маводи нашъаовар дар Ҷумҳурии Тоҷикистон ҳар чӣ бештар ҷидду ҷаҳд карда шавад.Сардори Раёсати кор бо ҷавонон, варзиш ва сайёҳии ВМКБ Р. Шодиков зикр намуд, ки теъдоди ҷавонони варзишгар сол аз сол меафзояд, ки ин, дар навбати худ, ба ҷилавгирии нашъамандии байни ҷавонон мусоидат мекунад.Дар хотимаи ҷаласа ба нақшаи кори Шӯрои ҳамоҳангсозӣ пешниҳодҳои муфид ворид карда шуданд.Дар ин бора аз Агенти назорати маводи нашъаовари назди Президенти ҶТ ба АМИТ «Ховар» хабар доданд.