“Роҳ ба сӯи мактаб”- аксияи хайриявии ҲХДТ

Душанбе, 16 август. (АМИТ «Ховар», Зарангези Латиф).- Ҳизби Халқии Демократии Тоҷикистон аз 12 август то 1 сентябри соли 2013 вобаста ба дастгирии ниёзмандон, ҷиҳати фароҳам сохтани шароит ва ҳалли мушкилоти табақаҳои осебпазири ҷомеа, аз ҷумла ятимон, бепарасторон, кўдакон аз оилаҳои камбизоат ва хусусан кӯдакони дорои маълулияти синни мактабӣ аксияи хайриявиро таҳти унвони «Роҳ ба сўи мактаб» роҳандозӣ менамояд. Дар доираи ин аксия аз ҷониби кумитаҳои иҷроияи вилоятӣ, шаҳриву ноҳиявӣ бо ҷалби аъзо ва ҷонибдорони ҲХДТ фарзандони оилаҳои камбизоат, ятимон, бепарасторон ва махсусан кўдакони дорои маълулият бо либос ва дигар лавозимоти мактабӣ таъмин мешаванд. Субҳи дирӯз сардори Маркази таблиғот ва иттилооти кумиҷроияи вилоятии ҲХДТ Сарфароз Юнусов ва раиси комиҷроияи шаҳри Хуҷанд Наим Маликисломов дар мактаб-интернати ёрирасони шаҳри Хуҷанд бо омӯзгорон ва мураббиёни ин дабистон вохӯрданд.   Аз ҳисоби фонди молиявии КИ ҲХДТ дар шаҳри Хуҷанд барои хонандагон лавозимоти хониш ва инчунин барои омӯзгорон як адад мизи корӣ тақдим гардид. Маврид ба ёдоварист, ки аксия дар ҳамаи шаҳру ноҳияҳо идома дорад. Дар ин бора ба хабарнигори АМИТ «Ховар» Адҳам Мирсаидов, роҳбари Маркази таблиғот ва таҳлилии дастгоҳи КИМ ҲХДТ иттилоъ дод.