Таъмини амнияти экологиву санитарӣ дар Ҳисор

Душанбе, 5 август. (АМИТ «Ховар», Назир Назиров).-Зимни суҳбат бо мухбири АМИТ «Ховар» Насрулло Маҳмадалиев, сардори шуъбаи ҳифзи муҳити зисти ноҳияи Ҳисор гуфт, ки таъмини амнияти экологиву санитарӣ яке аз самтҳои муҳими фаъолияти пурмаҳсули соҳаи ҳифзи муҳити зист маҳсуб мешавад. Масъалаи беҳтар ба роҳ мондани таъминоти аҳолӣ бо оби нўшокии босифат, таъмири шабакаҳои обу корезӣ, нигоҳ доштани минтақаҳои обӣ дар ҳолати мусоид ва арзанда қарзи виҷдонии сохтору мақомоти давлатист. Шуъбаи ҳифзи муҳити зисти ноҳияи Ҳисор тибқи талаботи қонунгузории ҳифзи муҳити зист ва Кодекси оби Ҷумҳурии Тоҷикистон дар шаш моҳи аввали соли 2013 назоратро доир ба таъмини аҳолӣ бо оби нӯшокӣ, истифодаи оқилона ва тоза нигоҳ доштани манбаъҳои обӣ аз болои субъектҳои хоҷагидор ва аҳолӣ пурзўр намуд. Дар ин давра корҳои ташвиқу тарғиботии шуъба низ назаррас буданд. Бо мақсади пешгирии ифлосшавии манбаъҳои обӣ моҳи апрели соли ҷорӣ бо иштироки намояндагии мутахассисони кумита, кормандони воситаҳои ахбори умум, сохторҳои дахлдори маҳал дар соҳили манбаъҳои обии ноҳия канали магистралии Ҳисор, дарёҳои Хонақоҳ ва Кофарниҳон, ки дар ҳудуди ҷамоати шаҳраки Ҳисор воқеанд, ҷамоатҳои деҳоти Алмосӣ, Хонақоҳи Куҳӣ, Сомон, Мирзо -Турсунзода Ҳисор, Ориён ва Деҳқонободи ин ноҳия, дар сатҳи баланди ободонӣ аксияи «Тозагии соҳил-2013» гузаронида шуда, зиёда аз 50 тонна партовҳоро ба партовгоҳи расмии ноҳия интиқол доданд ва 3 км дарёву каналу заҳбурҳоро аз хасу хошок тоза карданд. Зикр бояд кард, ки манбаи захираҳои обии ноҳияи Ҳисор аз мавзеи деҳаи Шамол оби мусаффову зулоли дарёи Хонақоҳ фаввора зада, ба нишебӣ ҷорӣ мешавад. Дар маҷрои худ чандин деҳаву маҳалҳои поинро шодобу муаттар сохта, лабташнагонро об медиҳад. Кофарниҳон дарёи сарҳадгузар буда, қисми 50 километрааш аз ҳудуди ноҳияи Ҳисор гузашта, то Амударё ва баҳри Арал рафта мерасад. Қисми 21 километраи канали магистралии Ҳисор аз ҳудуди ноҳия гузашта заминҳои кишоварзии водии Ҳисорро таъмин менамояд.