Ҳамкории Тоҷикистону Туркманистон дар бахши савдо

Душанбе, 23 сентябр. (АМИТ «Ховар», Кристина Эрлих). – Рӯзи ҷумъаи гузашта дар шаҳри Душанбе мулоқоти раиси Палатаи савдо ва саноати Тоҷикистон Шариф Саид бо Сафири Туркманистон дар Тоҷикистон Чинор Рустамова баргузор гардид. Сабаби ин мулоқот хатми фаъолияти дипломатии сафири Туркманистон дар Тоҷикистон буд. Дар ин бора аз маркази матбуоти Палатаи савдо ва саноати Тоҷикистон ҶТ ба АМИТ «Ховар» хабар доданд.Ш.Саид ба Ч.Рустамова барои саҳми бузургаш ба ҳамкории ду кишвар изҳори миннатдорӣ карда, зикр намуд, ки дар давраи фаъолияти сафир намоишгоҳҳои муштарак доир намуда, ҳамоишҳои соҳибкорони Тоҷикистону Туркманистон сурат гирифтанд. Чинор Рустамова ба раиси Палатаи савдо ва саноат барои ҳамкориаш изҳори сипос карда, таҷриба ва фаъолияти судманди ӯро ба дараҷаи баланд арзёбӣ намуд. Сафир ҳамчунин қайд намуд, ба туфайли фаъолияти Палатаи савдо ва саноати ҶТ на фақат ҳамкории ҳар ду палата балки ҳамкории тиҷоратию иқтисодии ҳар ду кишвар ҳам босуръат рушду густариш меёбад.