Ифтитоҳи намоишгоҳи маҳсулоти кишоварзии Тоҷикистон дар Сочи

Душанбе, 22 сентябр. (АМИТ «Ховар»). — Имрӯз дар шаҳри Сочии Федератсияи Русия намошгоҳи маҳсулоти кишоварзии Тоҷикистан расман ифтитоҳ гардида, барномаи консертии ҳунармандони шинохтаи тоҷик пешниҳоди иштирокдорон шуд. Расму оинҳои миллӣ, маҳсулоти кишоварзӣ, меваҳои шаҳдбори Тоҷикистони биҳиштосо- ин ҳама дар шаҳри сайёҳии Русия- Сочи муаррифӣ шуданд. Дар расми ифтитоҳи ин намоишгоҳ муовини Сарвазири Тоҷикистон Муродалӣ Алимардон иштирок намуд. Мавриди зикр аст, ки баргузории намоишгоҳи бузург таҳти унвони «Неъматҳои бебаҳои табиии Тоҷикистон» дар шаҳри Сочи бори аввал нест. Ҳанӯз соли 2006 сокинону меҳмонони шаҳри Сочи аз маҳсулоти кишоварзӣ, меваҳои шаҳдбор ва таомҳои миллии мардуми тоҷик ба таври фаровон истифода бурда буданд. Ин навбат бошад, бо ворид кардани зиёда аз 1000 тонна маҳсулоти тару тоза, аз қабили беҳтарин номгӯи меваю cабзавот ва полезиҳо таваҷҷуҳ ба неъматҳои табиӣ ва ҳунари волои мардуми Тоҷикистон бештар ба назар мерасад. Дар давоми ин рӯзҳо ҳудуди як миллион нафар аз намоишгоҳи Тоҷикистон дидан намуда, аз маҳсулоти кишоварзие, ки аз ҷиҳати экологӣ тоза арзёбӣ мешавад, харид карданд. Иттифоқи «Тоҷикматлубот», ки таъсисдиҳандаи ин чорабинӣ аст, бо пешниҳоди меваҳои шаҳдбор, 40 номгӯи таомҳои миллӣ ва маҳсулоти тару тозаи кишоварзӣ тавонист чорабиниро дар сатҳи баланд ба роҳ монад. Аз шодию нишоти иштирокдорони чорабинӣ аён буд, ки дастандаркорони намошгоҳ омодагии ҳамаҷониба дидаанд. Харидорони молу маҳсулоти Тоҷикистон танҳо сокинони ин шаҳри сайёҳии Федератсияи Русия набуданд. Шаҳрвандони давлатҳои пешрафтаи дунё, аз қабили Амрикову Олмон, Фаронсаву Италия, Туркияву Чин низ аз тамошои намоишгоҳ таассуроти нек бардоштанд, зеро дар ин ҷо барои харид ва иштирок дар чорабиниҳои фарҳангӣ имконияти васеъ фароҳам оварда шудааст. Ба гуфти иштироккунандагон баргузории чунин чорабиниҳо, ки қадами устувор дар самти густариши ҳамкориҳо дониста мешаванд, халқиятҳоро ба ҳам меорад ва равобити дӯстонаи онҳоро қавӣ мекунад. Гуфтанист, Тоҷикистон, ки бо меваҳои шаҳдбор ва табиати биҳиштосо дар дунё муаррифӣ шудааст, шуруъ аз соли 2000- ум дар як қатор кишварҳои дунё маҳсулоти кишоварзиро ба маъраз мегузорад. Ин ташаббус метавонад равобити дӯстонаро бо дигар давлатҳо мустаҳкамтар намояд. Меваҳои Тоҷикистон, аз ҷумла ангуру нок, себ, лиму дар намоишгоҳи бузург харидорони бештар дошт. Полезиҳо низ ба сокинону меҳмонони шаҳри Сочи писанд буд, зеро ҳар харидор баъди муайян намудани тамъи он харидорӣ мекард. Ҳунармандони ансамблҳои «Дарё», «Ориё», «Гулрез», «Ҷаҳоноро» ва дигар санъаткорони шинохтаи Тоҷикистон бо пешниҳоди барномаи консертӣ хотири иштирокдоронро болида намуданд. Намоишгоҳ то 24-уми сентябр идома меёбад.