Консулгарии фахрии Тоҷикистон дар Днепропетровск

Душанбе, 12 сентябр. (АМИТ «Ховар»). – Чанде пеш дар Вазорати корҳои хориҷии Украина бо иштироки Сафири Фавқулодда ва Мухтори Ҷумҳурии Тоҷикистон дар Украина Шӯҳрат Султонов маросими ба Консули фахрии Ҷумҳурии Тоҷикистон дар шаҳри Днепропетровск Виктор Карачун супурдани ҳуҷҷати расмӣ дар бораи эътирофи ваколатҳо баргузор гардид. Сафири Тоҷикистон Шӯҳрат Султонов зимни суханрониаш қайд намуд, ки вилояти Днепропетровск ҳамчун ниҳоди асосии Украина имкониятҳои зиёди иқтисодӣ дошта, соли 2012 муомилоти моли он ба 17 миллиарду 500 миллион доллари ИМА расид. Бо назардошти ин басо муҳим аст, ки равобити иқтисодии вилоят бо Тоҷикистон густариш дода, мутобиқи Созишнома дар бораи ҳамкории минтақавии байни вилояти Днепропетровски Украина ва вилояти Суғди Тоҷикистон истеҳсоли муштараки маҳсулот роҳандозӣ шавад. Виктор Карачун дар навбати худ итминон дод, ки барои фаъолияти муваффақонаи консулгарӣ ва рушди ҳамкории байни вилояти Днепропетровск ва Тоҷикистон ҳамаи чораҳоро хоҳад дид. Барои маълумот: Виктор Иванович Карачун дар Тоҷикистон ба камол расида, баъди хатми донишкадаи олӣ ба ҳайси иқтисоддон кор мекард, алҳол раиси ширкати «Агротехбизнес» — и вилояти Днепроветровск буда, дар кори ҷамоаҳои вилоят фаъолона иштирок мекунад, робитаҳоро бо Тоҷикистон ҳамеша ривоҷу равнақ медиҳад, забони тоҷикиро медонад, мусиқию фарҳанги тоҷиконро дар байни мардум ҳамаҷониба ташвиқу тарғиб мекунад.