Мулоқоти Оқил Оқилов бо Директори генералии ширкати гази Пекин

Душанбе, 6 сентябр.(АМИТ «Ховар», Зарангези Латиф).- Имрўз Сарвазири Ҷумҳурии Тоҷикистон Оқил Оқилов бо Чжен Чзяншен — Директори генералии Ширкати Пекини Ҷумҳурии халқии Чин оид ба истеҳсоли ҳисобкунакҳои газӣ, ки яке аз ширкатҳои зертобеаш Гўруҳи байналмилалии саноатии «Кетлон» лоиҳаи муштараки дигаргунсозии корхонаи бузурги саноатии мамлакат «Тоҷикисемент»-ро дар Ҷумҳурии Тоҷикистон татбиқ менамояд, мулоқот кард. Тавре таъкид шуд, аз ҷониби Гўруҳи байналмилалии саноатии «Кетлон»-и Ҷумҳурии халқии Чин дар айни замон барои аз истифодаи гази табиӣ ба истифодаи ангишт гузаштани корхонаи «Тоҷиксемент» корҳои такмилсозӣ дар марҳилаи анҷомёбӣ қарор дошта, рўзҳои наздик навбати аввали лоиҳа бо иқтидори 600 тонна семент дар як шабонарўз мавриди амал қарор дода мешавад ва бо ҳамин фаъолияти корхонаи «Тоҷиксемент» бо ангиштсанг шўруъ мегардад. Дар мулоқот аз ҷониби ширкатҳои Ҷумҳурии халқии Чин дар мавриди бунёди корхонаҳои муштарак оид ба истеҳсоли ҳисобкунакҳои барқӣ ва ба фаъолият бо ангиштсанг гузаронидани марказҳои барқу гармидиҳии хурди Тоҷикистон изҳори омодагию ҳавасманӣ зоҳир карда шуд.