Низоми нави назорат дар роҳҳои Душанбе

Душанбе, 25 сентябр. (АМИТ «Ховар», Марҳабо Зунунова). – Ба фикри иштирокдорони семинари дурӯза, ки дар шаҳри Душанбе анҷом ёфт, дар пойтахти кишвар ҷорӣ намудани низоми нави назорат ва ҷудо намудани роҳҳои ҳаракати нақлиётии ҷамъиятӣ сифати ҳаракати нақлиётро хеле беҳтар намуда, мушкилоти танбашавии нақлиёти ҷамъиятиро аз байн мебарад.Дар ин бора менеҷери лоиҳаи «Дастгирии идораи устувори нақлиёт дар шаҳри Душанбе» Умеда Ҳоҷиматова ба АМИТ «Ховар» хабар дод. Мувофиқи суханони Умеда Ҳоҷиматова, ин иқдоми муҳим дар доираи лоиҳаи зикршуда роҳандозӣ шуда, дар татбиқи он роҳбарони ҳамаи корхонаҳои воҳиди давлатии бахши нақлити ҷамъиятӣ, намояндагони ҳукумати пойтахт, мутахассисони Пажӯҳишгоҳи тадқиқоти илмии нақлиёт, Донишгоҳи техникии Тоҷикистон ба номи М.Осимӣ, Агентии меъморию шаҳрсозӣ ва созмонҳои дигари манфиатдор фаъолона иштирок намуданд. Иштирокдорони семинар аз рӯи натиҷаи рӯзи аввал масоили ҷорӣ намудани низоми нави назорат ва дурнамои рушди хадамоти назорат аз нигоҳи баланд бардоштани сифати хидматрасонии назоратчиёну операторони ширкатҳои мусофирбари шаҳрро мавриди муҳокима қарор доданд. Хотирнишон месозем, ки мақсад аз лоиҳаи «Дастгирии идораи устувори нақлиёт дар шаҳри Душанбе» кам кардани миқдори партовҳои моддаҳои ифлоскунанда мебошад, ки он дастрасӣ ва сифати хидматрасонии нақлиёти ҷамъиятии шаҳри Душанберо беҳтар месозад.