Ҷаласаи ситоди Оқил Оқилов дар Суғд

Душанбе, 25 октябр. (АМИТ “Ховар”, Фарзона Ашӯрмадова).-Имрӯз дар мақомоти иҷроияи маҳаллии ҳокимияти давлатии вилояти Суғд таҳти раёсати Сарвазири Ҷумҳурии Тоҷикистон Оқил Оқилов ҷаласаи сайёри ситоди ҷумҳуриявӣ оид ба замистонгузаронӣ баргузор гардид. Дар оғози ҷаласа роҳбарони шаҳру ноҳияҳои вилоят, масъулони сатҳи аввали соҳаҳои гуногуни хоҷагии халқ ва роҳбарони ташкилоту идораҳои вилоятӣ оид ба омодагӣ ва тадбирҳои дар сатҳи зарурӣ гузаронидани давраи тирамоҳу зимистони солҳои 2013-2014 ҳисобот доданд.Тавре ки таъкид шуд, барои дар сатҳи баланд гузаронидани давраи тирамоҳу зимистон дар қаламрави вилоят корҳои аввалиндараҷа, аз ҷумла омода кардани иншооти энергетикӣ, роҳу нақлиёт, захираи кофии сӯзишворӣ, маҳсулоти саноатию хӯрокворӣ ва таъмиру тармими дигар иншооти муҳими хоҷагии халқи вилоят ба анҷом расонида шудааст.Сарвазири мамлакат Оқил Оқилов бо натиҷагирӣ аз ҷараёни омодагиҳо ба мавсими зимистонгузаронӣ дар қаламрави вилоят изҳор дошт, ки бо вуҷуди пешравиҳо ва омодагиҳои ҷиддӣ ба ин давра мушкилот ва камбудиҳои зиёд низ мавҷуд мебошад, ки барои бартараф кардани онҳо бояд тадбирҳои саривақтии иловагӣ андешида шаванд.Оқил Оқилов махсусан аз раванди иҷро нагардидани нақшаи ҷамъоварии маблағи барқи истифодашуда, пурра фаъолият накардани нерӯгоҳҳои хурди барқи обӣ ва таъмин накардани нақшаи истихроҷи нафт ва гази табиӣ изҳори нигаронӣ карда, ҷараёни захираи ангиштсанг ва ҳезум дар ташкилоту муассисаҳои маорифу тандурустӣ, инчунин нақшаи тайёр кардани хӯроки чорво дар хоҷагиҳои кишоварзии вилоятро қаноатбахш арзёбӣ намуд.Сарвазири мамлакат ба роҳбарони идораҳои дахлдор, роҳбарияти вилоят ва шаҳру навоҳии он, инчунин ба роҳбарони ташкилоту идораҳои вилоятӣ барои омодагии ҷиддӣ ва дар сатҳи зарурӣ гузаронидани давраи тирамоҳу зимистон, сари вақт бартараф намудани камбудиву нуқсонҳои ҷойдошта, таъмини фаъолияти мунтазами ситодҳои зимистонгузаронии вилоят ва шаҳру ноҳияҳои он ва зери назорат қарор додани кори тамоми сохторҳои вилоят дастуру супоришҳои мушаххас дод.