Афзоиши истихроҷи ангишт дар ҷумҳурӣ

Душанбе, 26 октябр. (АМИТ “Ховар”, Фарзона Ашӯрмадова).-Вазорати энергетика ва саноати Ҷумҳурии Тоҷикистон ҷиҳати омодагӣ ба мавсими тирамоҳу зимистони солҳои 2013-2014 дар доираи корхонаҳои соҳаи ангишт нақшаю чорабиниҳо тартиб дода, дар ин самт мунтазам тадбирҳо меандешад.Тавре ки дар ин бора аз Вазорати энергетика хабар доданд, аз нишондиҳандаҳои 10-моҳаи соли ҷорӣ бармеояд, ки корхонаҳои соҳа дар ин давра истихроҷи ангиштро ба 414 ҳазор тонна расонидаанд ва ин нисбат ба ҷамъбасти соли 2012 зиёд мебошад. Гуфта мешавад, ки фурӯши ангишт дар давраи ҳисоботӣ 360 ҳазор тоннаро ташкил додааст. Захираи ангишт дар анборҳои корхонаҳои соҳаи ангишт ва нуқтаҳои фурӯш зиёда аз 88,8 ҳазор тоннаро ташкил медиҳад. Ёдрас мешавем, ки дар айни замон дар ҷумҳурӣ зиёда аз 162 корхонаи саноатӣ фаъолияташро бо истифода аз ангишт ба роҳ мондааст.