Кумитаи корҳои дин кори ҳоҷиёнро осон кардааст

Душанбе, 7 октябр. (АМИТ «Ховар», Афшини Муқим).- Барои фароҳам овардани фазои мусоиди ибодат барои зиёраткунандаҳои Хонаи Худо, гуруҳи кории ситоди ҳаҷи Ҷумҳурии Тоҷикистон аз тамоми имкониятҳои мавҷуда истифода менамояд, то интиқоли ҳоҷиён ба Масҷид-ул-Ҳаром сари вақт ва бидуни монеа сурат бигирад. Имсол гуруҳи кории Кумитаи оид ба корҳои дини назди Ҳукумати Ҷумҳурии Тоҷикистон, ки ҳамзамон роҳбарии ситоди «Ҳаҷ- 2013»-ро ба зимма дорад, бо истифода аз имкониятҳо дар натиҷаи ҷаҳду талошу музокирот бо кишвари мизбон масофаи байни истгоҳҳои нақлиёт ва Каъбаро ба маротиб наздиктар намудааст. Азизулло Мирзоев, масъули меҳмонхонаҳои шаҳри Макка мегӯяд: «Рӯзҳои аввал масофаи байни Ҳарам ва истгоҳҳо тақрибан як километрро ташкил медод, аммо дар натиҷаи баррасиҳои ситоди ҳаҷи Ҷумҳурии Тоҷикистон ин масофа аз як километр ба 150 метр расонида шуд. Ин дар ҳолест, ки ба қавли Азизулло Мирзоев бино бар сабаби идома ёфтани корҳои сохтмонӣ дар атрофи Хонаи Худо зоирони баъзе кишварҳо то расидан ба Масҷид-ул-Ҳаром аз як то 2 километр роҳро тай мекунанд.