Меъёри бозтамвил 0,6 банди фоизӣ поин бурда шуд

Душанбе, 9 октябр. (АМИТ «Ховар», Л. Қосимова). –  7 октябри соли равон бо қарори навбатии Раёсати Бонки миллии Тоҷикистон (БМТ) меъёри бозтамвил ба андозаи 0,6 банди фоизӣ паст ва дар сатҳи 5,5 фоизи солона муқаррар гардид. 
    Тағйироти навбатӣ бо мақсади таъмини самараноки сиёсати пулию қарзӣ, нигоҳдории муътадилии ҳаҷми пул дар муомилот, мусоидат ба рушди воқеии иқтисодиёт ва бо ин роҳ паст кардани фоизи миёнаи қарзҳо дар низоми бонкӣ бо назардошти кам гардидани фишорҳои таваррумӣ ва таъсири омилҳои берунӣ ворид  шудааст. 
Зикр кардан бамаврид аст, ки маротибаи аввал  имсол меъёри бозтамвили Бонки миллии Тоҷикистон 8 июли соли равон ба андозаи 0,4 банди фоизӣ паст  шуда буд. 
     Дар ин бора ба АМИТ «Ховар» аз хадамоти матбуоти  БМТ хабар доданд.