Омӯзиши таъсиси намудҳои муносиб дар Варзоб

Душанбе, 23 октябр. (АМИТ «Ховар», С.Солех).-Аз 29 то 31 октябр дар маҷмааи фароғатии «Ҷаҳонгир”-и ноҳияи Варзоб бо дастгирии барномаи «Рушди барвақтии кӯдак»-и Институти «Ҷамъияти кушода» — Бунёди Мадад дар Тоҷикистон ва лоиҳаи шабакавии Рушди барвақтии Институти «Ҷамъияти Кушода»-и Лондон барои намояндаҳои мақомоти маҳаллии ҳокимият, мудирони шуъбаву идораҳои маориф ва омӯзгорон аз ноҳияҳои Айнӣ, Мастчоҳи Куҳӣ, Ҷиргатол, Тавилдара, Рӯшон ва шаҳрҳои Душанбе, Панҷакент, Кӯлоб, Кӯрғонтеппа оид ба таъсиси моделҳои ҷойгузини «Марказҳои омода кардани кӯдакон ба мактаб» омӯзишҳо баргузор мегарданд. Ҳадафи баргузории омӯзишҳо – таҷрибаи лоиҳаи ҳамкорӣ бо мақомоти ҳокимияти маҳаллӣ оид ба таъсиси моделҳои ҷойгузини «Марказҳои омода кардани кӯдакон ба мактаб» дар маҳалҳое мебошад, ки муассисаҳои томактабӣ вуҷуд надоранд ва ё фарогирии кӯдакон бо хизматрасонии таҳсилотӣ дар сатҳи паст қарор дорад. Ҳадафи рушди барвақтии кӯдак барои дастрасии босифати таҳсилот ба кӯдаконе равона шудааст, ки имконияти гирифтани таҳсилоти томактабиро надоранд ва ё барои ин дар низоми маориф ва ё умуман дар ҷомеа садде мавҷуд аст.