Ш. Зуҳуров хостори тавсеаи ҳамкории парлумонӣ бо Ҷопон шуд

Душанбе, 5 октябр.(АМИТ «Ховар», Марзия Саидова).- Сатҳи ҳамкориҳои ҳасанаи гуногунсоҳаи Тоҷикистон ва Ҷопон, равобити байнипарлумонӣ ва ҳамкориҳои ду кишвар дар доираи созмонҳои мухталифи байналмилалӣ дар меҳвари мулоқоти Шукурҷон Зуҳуров- раиси Маҷлиси намояндагон ва Такаюки Коике -сафири фавқулодда ва мухтори Ҷопон дар Тоҷикистон қарор доштанд. Шукурҷон Зуҳуров доир ба фаъолияти палатаи поёнии Парлумони мамлакат ба дипломати ҷопонӣ маълумот дода, нақши палатаи касбии Парлумони ҷумҳуриро дар рушди соҳахои мухталифи кишвар муҳим арзёбӣ кард. Ҳамзамон бо дахли муносиботи байнипарлумонӣ Ш. Зуҳуров гуфт, ки Парлумони Ҷопон бо такя ба пешрафту таҷрибае, ки дар бахши таҳия, қабул ва тасвиби қонун ва дигар санадҳои байналмилалӣ дорад, метавонад ба таҳкими равобити парлумонии ду кишвар саҳми муносиб гузорад. Имрӯз, муносибатҳои парлумонии байни ҳар ду кишвар моро қонеъкунонида наметавонад, бо вуҷуде, оне ки дар Парлумонҳои ҳар ду кишвар гурӯҳҳои дӯстии парлумонии Тоҷикистону Ҷопон таъсис дода шудаанд, таъкид кард раиси Парлумони Тоҷикистон. Дар ин замина ҷонибҳоро лозим аст, ки ҷиҳати рушди дурнамои равобити парлумонӣ заминаи мусоидеро фароҳам оваранд. Инчунин, зимни баррасии масоили тавсеаи ҳамкориҳои иқтисодию тиҷоратӣ Ш. Зуҳуров гуфт, ки имрӯз вақти он расидааст, ки мо ҳамкории мутақобилан судманди иқтисодиро байни кишварҳо густариш диҳем. Бо истифода аз имконоти мавҷуда ҷониби Ҷопон бо мо дар соҳаи амнияти озуқаворӣ ҳамкории хубе дошта бошад. Иқлими Тоҷикистон барои рушди боғпарварӣ шароити мусоид дорад. Аз ин рӯ тоҷирони ҷопонӣ имкон доранд, бо сохтани корхонаҳои хурди коркарди мева ва содироти меваи тару тоза бо кишвари мо ҳамкорӣ дошта бошанд. Дипломати ҷопонӣ Такаюки Коике доир ба фаъолияти Парлумони кишвараш иттилоъ дода гуфт, ки мақоми олии ҳокимияти давлативу қонунгузори Ҷопон низ аз ду палата иборат аст. Палатаи намояндагон, ки 480 намоянда дошта, ба муддати 4 сол интихоб мешаванд ва палатаи шӯро, ки аз 252 вакил иборат буда, ваколаташон 6 сол муайян шудааст. Дар мулоқот ҳамчунин раванди иҷрои лоиҳаҳои иқтисодиву тиҷоратӣ баррасӣ ва роҳҳои густариши дурнамои муносиботи мутақобилан судманди ду кишвар муҳокима шуданд.