Амалиёти нодири ҷарроҳӣ дар Хуҷанд

Душанбе, 11 ноябр. (АМИТ «Ховар», Лутфия Эшонқулова).- Дар таваллудхонаи шаҳри Хуҷанд бори аввал занони мубталои бемориҳои узвҳои дарунӣ бо истифода аз таҷҳизоти лапароскопӣ ҷарроҳӣ шуданд. Чунин амалиёти ҷарроҳӣ бори нахуст дар шимоли ҷумҳурӣ сурат мегирад. Назар ба хабари хадамоти матбуоти раиси вилояти Суғд, тамоми ҷараёни амалиёти ҷарроҳӣ бо истифода аз таҷҳизоти ҷарроҳии лапароскопии сохти Олмон рӯи кор меояд. Ин таҷҳизот бо дастгирии ҳукумат ва ёрии молиявии яке аз бонкҳои Арабистони Саудӣ харидорӣ шудааст.Мувофиқи суханони сардухтури таваллудхонаи шаҳри Хуҷанд Шоира Бузрукова, чунин амалиёти нодири ҷарроҳиро ду нафар табибоне, ки дар марказҳои тиббии Русия ва шаҳри Душанбе таълим гирифтаанд, ба роҳ мондаанд. Шоира Бузрукова зикр намуд, ки дар ҳоли ҳозир мутахассисони номбурда чор маротиба чунин амалиёти ҷарроҳиро роҳандозӣ намудаанд.