Ифтитоҳи боғча ва гимназия дар ноҳияи Ҳамадонӣ

Ҳамадонӣ, 28 ноябр. (АМИТ «Ховар», С. Холов).- Дар арафаи таҷлили Рӯзи Парчами давлатӣ бо дастгирии мақомоти иҷроияи ҳокимияти давлатии ноҳияи Ҳамадонӣ ва шуъбаи маорифи ноҳия дар маркази ноҳия боғчаи нави кӯдакона мавриди истифода қарор гирифт. Боғча аз ду ошиёна иборат буда, барои тарбияи кӯдакон тамоми шароитҳо муҳаё карда шудааст. Мақомоти маҳаллӣ ва шуъбаи маорифи ноҳия мақсад доранд, ки дар оянда барои қабули бештари кӯдакон шароит фароҳам оранд. Дар ҳамин рӯз аз ҷониби ҳокимияти давлатии ноҳия бинои гимназияи давлатӣ низ баъди таъмири асосӣ мавриди истифода карор дода шуд. Бино аз 9 синфхона иборат буда, имкони дар ду баст ба таҳсил фаро гирифтани 240 хонандаро дорад. Дар гимназияи давлатӣ беҳтарин омӯзгорон ба кор кабул карда шудаанд.