Парлумон Созишномаи қарзиро ба тасвиб мерасонад

Душанбе, 25 ноябр.(АМИТ «Ховар», Марзия Саидова).- Дар ояндаи наздик палатаи поёнии Парлумони Тоҷикистон ба Кодекси андоз ва Кодекси ҷиноятии Ҷумҳурии Тоҷикистон тағйиру иловаҳо ворид менамояд. Масъалаи мазкур 25 ноябр дар ҷаласаи Шӯрои Парлумони мамлакат, ки таҳти раёсати Шукурҷон Зуҳуров -раиси Маҷлиси намояндагон баргузор гардид, баррасӣ шуд.Аъзои Шӯро дар ҷаласа ҳамзамон лоиҳаи Қонунҳои Ҷумҳурии Тоҷикистон «Оид ба ворид намудани тағйиру илова ба Қонуни Ҷумҳурии Тоҷикистон «Дар бораи милитсия», «Дар бораи суғуртаи давлатии иҷтимоӣ», „Дар бораи пешгирии зӯроварӣ дар оила“, «Оид ба ворид намудани илова ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2013», Созишномаи грантӣ байни Ҷумҳурии Тоҷикистон ва Ассотсиатсияи байналмилалии рушд оид ба лоиҳаи «Беҳтаркунии хизматрасонии тиббӣ», Созишномаи қарзӣ байни Ҷумҳурии Тоҷикистон ва Фонди Саудии Рушд оид ба лоиҳаи «Сохтмон ва таҷҳизонидани мактабҳои миёна»-ро баррасӣ намуданд. Дар фарҷом қисме аз масъалаҳои муҳокимашуда ҷиҳати баррасӣ ва қабул ба ҷаласаи навбатии иҷлосияи панҷуми Маҷлиси намояндагон, даъвати чорум пешниҳод шуданд.