Комиссияи оид ба масоили амнияти сарҳадот

Душанбе, 3 декабр. (АМИТ «Ховар», Лутфия Эшонқулова).- Дар ҷараёни конфронси серӯза, ки дар шаҳри Душанбе баргузор гардид, тасмим гирифта шуд, ки комиссияи муштарак оид ба масоили амнияти сарҳадот, муқобилат ба гардиши ғайриқонунии маводи мухаддир ва таҳкими ҳамкории байни минтақаҳои ду кишвар таъсис дода шавад.Хотирнишон месозем, ки Раёсати СММ оид ба маводи мухаддир ва ҷинояткорӣ дар ҳошияи «Барномаи минтақавӣ оид ба Афғонистон ва кишварҳои ҳамсоя барои солҳои 2011- 2014» аз 30 ноябр то 2 декабр конфронси оид ба ҳамкории Афғонистону Тоҷикистон дар бахши назорати маводи мухаддирро доир намуд.Назар ба хабари маркази матбуоти Агенти назорати маводи нашъаовар, тайи се рӯз тадбирҳо ҷиҳати ҳамкории байни Афғонистону Тоҷикистон ба манзури муқобилат ба гардиши ғайриқонунии маводи мухаддир мавриди муҳокима қарор гирифта, саъю кӯшишҳои дуҷониба барои ҷилавгирии хавфу хатари маводи мухаддири Афғонистон баррасӣ шуданд.Конфронс имкон дод, ки чораҳои нав ҷиҳати ҳамкории байни ду кишвар ба манзури ҷилавгирӣ ва муқобилат ба гардиши ғайриқонунии маводи мухаддир ва саъю кӯшишҳои дуҷониба барои коҳиш додани хавфи маводи мухаддири Афгонистон муҳокима шаванд.