Кумитаи ҳолатҳои фавқулодда ба ҳолати омодабоши доимӣ гузашт

Душанбе, 16 декабр. (АМИТ «Ховар», Лутфия Эшонқулова).-Вобаста ба омодагӣ гирифтан дар мавсими зимистони имсола, бахусус дар ҳолатҳои боришоти барфу борони рўзҳои 16-18 декабр аз ҷониби роҳбарияти Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон дар асоси огоҳии Муассисаи давлатии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон ба ситодҳо оид ба ҳолатҳои фавқулодда ва мудофиаи граждании вилоятҳо ва шаҳру ноҳияҳои кишвар супоришҳои мушаххас дода шуд.Тавре ки сардори маркази матбуоти кумитаи мазкур Ориф Нозимов иттилоъ дод, ҳамзамон ҳайати шахсии ситодҳо оид ба ҳолатҳои фавқулодда ва мудофиаи граждании вилоятҳо ва шаҳру ноҳияҳои мамлакат дар ин рўзҳои сард ба ҳолати омодабоши доимӣ гузаронида мешаванд.