Парлумон ба қонуни энергетика тағйирот ворид менамояд

Душанбе, 3 декабр.(АМИТ «Ховар», Марзия Саидова).-Дар ҷаласаи Шӯрои палатаи поёнии Парлумони мамлакат, ки 3 декабр таҳти раёсати Шукурҷон Зуҳуров, Раиси Маҷлиси намояндагони Маҷлиси Олии Ҷумҳурии Тоҷикистон баргузор гардид, лоиҳаи қонунҳои Ҷумҳурии Тоҷикистон «Оид ба ворид намудани тағйиру илова ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2013», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи энергетика» баррасӣ гардиданд. Аъзои Шӯрои Маҷлиси намояндагон ҳамзамон Созишномаи грантӣ байни Ҷумҳурии Тоҷикистон ва Ассотсиатсияи байналмилалии рушд оид ба лоиҳаи «Беҳтаркунии хизматрасонии тиббӣ», Созишномаи қарзии иловагӣ байни Ҷумҳурии Тоҷикистон ва Бонки Исломии Рушд оид ба лоиҳаи «Обтаъминкунии шаҳри Душанбе» -ро матраҳ намуданд. Тамоми масъалаҳои дар ҷаласаи Шӯро баррасигардида ҷиҳати муҳокима ба ҷаласаи навбатии иҷлосияи панҷуми Маҷлиси намояндагони Маҷлиси Олии Ҷумҳурии Тоҷикистон даъвати чорум пешниҳод карда шуданд.