Ҳалокати шаҳрвандони Тоҷикистон дар Челябинск

Душанбе, 17 январ. (АМИТ «Ховар», Лутфия Эшонқулова).- Бар асари садамаи нақлиётӣ дар шаҳри Челябински Федератсияи Русия ду нафар шаҳрвандони Тоҷикистон ба ҳалокат расиданд. Дар ин бора котиби матбуоти Намояндагии Хадамоти муҳоҷирати ҶТ Иброҳим Аҳмадов ба АМИТ «Ховар» хабар дод. Мувофиқи маълумоти номбурда, имрӯз, 17 январ, тахминан соати 7 – и субҳ дар роҳи мошингарди Челябинск – Екатеринбурги ноҳияи Касли бар асари бархурди мошинҳои мусофирбари «Опель» ва «Газель» се нафар ба ҳалокат расиданд, ки ду нафари онҳо шаҳрвандони Тоҷикистон ва як нафараш шаҳрванди Ӯзбекистонанд. Назар ба хабари корманди Намояндагӣ Шоҳназар Табаров, шаҳрвандони ба ҳалокатрасидаи Тоҷикистон сокини деҳаи Зосуни ноҳияи Айнӣ Шодиев Шодӣ ва сокини деҳаи Доваи ноҳияи Рашт Раҳмонов Зоҳирҷон будаанд. Алҳол дар маҳалли садама кормандони шуъбаи тафтишоти ноҳияи Каслии вилояти Челябинск кор мекунанд. Назар ба гуфтаи сардори шуъбаи тафтишоти ноҳияи Касли Татяна Куликова, алҳол тафтишот идома дорад.