«Фасли руъё» дар «Сафина»

Душанбе, 16 январ.(АМИТ «Ховар»,Фарзона Достонзода).-Идораи таҳия ва дубляжи филмҳои бадеии Муассисаи давлатии «Телевизиони «Сафина» дар соли 2013-ум 22 филми бадеӣ ва 66 филми мустанадро тарҷума ва пахш кард, — гуфт зимни нишасти матбуотӣ 16 январ муовини аввали директори ин телевизион Карим Азизов. Вай афзуд, ки аз ҷумла дар давраи ҳисоботӣ филмҳои бадеии «Доғ», «Орзуи рассом» ва филмҳои кӯтоҳметраи «Подош», «Нишона» ва «Танҳоӣ» таҳия ва пешкаши бинандаҳо шуда, айни замон навобардории филми бадеии «Фасли руъё » идома дорад.«Бо мақсади иҷрои Нақшаи чорабаниҳои «Барноми рушди забони давлатии Тоҷикистон барои солҳои 2012-2016» роҳбарияти МД «Телевизиони «Сафина» тасмим гирифтааст, ки дар соли 2014 бо фароҳам овардани шароити зарурии техникиву эҷодӣ тарҷума ва дубляжи филмҳоро ба забони тоҷикӣ боз ҳам бештар ба роҳ монад», — таъкид намуд К. Азизов.Мавриди зикр аст, ки бино ба иттилои масъулин бо ташкил намудани гурӯҳи дуюм дар ТВС давоми як моҳ ба забони тоҷикӣ дубляж кардани 4 филми бадеии мустанад имкон дорад.