Пешравиҳои назарраси сохтмончиён дар ноҳияи Айнӣ

    Айнӣ, 15.02.2014. (АМИТ «Ховар», Гулбаҳори Худойбердӣ). -Тайи солҳои охир дар ноҳияи Айнӣ сохтмонҳои маъмурию иҷтимоӣ вусъати тоза меёбанд. Тавре ки сардори шуъбаи сохтмон ва меъмории ноҳия Одил Одилов ба хабарнигори АМИТ «Ховар» иттилоъ дод, тӯли соли равон аз тарафи ин шуъба 309 аризаи шаҳрвандон баррасӣ шуд. Аз ҷумла , ба 259 барои гирифтани қитъаи замин ва ба 9 нафар барои оғози сохтмони хона иҷозат дода шуд.
   Дар соли 2013 ба маблағи 333 ҳазору 120  ҳазор сомонӣ корҳои сохтмонию пудратӣ ба иҷро расиданд, ки иҷрои он нисбат ба давраи муқоисавӣ 5045,6 ҳазор сомонӣ зиёд мебошад.
   Бо маблағҳои ҷудонамудаи мақомоти иҷроияи ҳокимияти давлатии ноҳия сохтмони мактаби деҳаи Вота барои 160 ҷой бо маблағи 518 ҳазор сомонӣ, бинои беморхонаи деҳаи Шаватки Боло бо маблағи 568 ҳазор сомонӣ, пули деҳаи Утогар бо маблағи 251,1 ҳазор сомонӣ  навсозӣ гардид.